CUGYM DO EUROPY

Stoi na stacji cug do Europy

we kery wsiadały niy same chopy.

W piyrszym jechały w szpiglach chopiônki,

w drugym żur, wuszty i chlyb do wodziônki.

we trzeciym były cepy z widłami,

śtyry maśnicki ze słômiônkami.

A czworty wagôn tyz niy był pusty.

Jechały bôncloki i gôwki kapusty.

W piątym na zygli – paplate chopy

kere fest cisły sie do Europy.

W szôstym rolada z modrôm kapustom,

a w siôdmym makrôny i bômbôn z łodpustu.

W łôsmym zaś jechoł Jorg z waszkorbami

i durch łobżyrôł sie krupniokami.

Do dziewiôntego zaś dziołszki wsiadły

i wszystkie posypki z kołocza zjadły.

W dziesiątym furgały szlajfy, kabotki

i insze takie babskie gupotki.

Do naszy bany tys mądrzy wsiedli

i żodyn niy wiy co łôni jedli,

szałot, żymloki cy bele co,

bo kożdy z nich w kabzi po Noblu mo.

A kedy to było? – Pytôm cie chopie.

Downo, bo downo my sôm w Europie.

H.L.