Koło w Piekarach Śląskich – zgpiekary.pl

FRASZOŁKI ŁO SZPORCIE.

SZPORT  TO ZDROWIE

Szport  to zdrowie! Wszyjscy dobrze wiedzôm,

a nojlepi ci, co na zofie siedzôm.

Styknie jym telewizor i to do gorści

by uprawiać szportowe wiadômości.

 

EURO SPOKO?

Syndzia piscołkôm doł znać

i nasi fusbalery zaczyni grać.

Gôniôm za balym. Sôm gôwki na buda.

Fany furgajôm. Raduje sie Smuda.

Pary jym stykło ino do połowy.

Niy pomôg nawet szpilplac blank nowy.

 

PO EURO.

Co takigo nasi fusbalery majôm,

że ino w cudzych landach gole szczylajôm?

A jak zaś łoblekôm z naszym orłym treski,

to jakby zmiyniył jym wtoś szłapy na deski.


CIYNGIYM LATO.

Nawet cicho baba robi sie pyskato,

jak na dworze zima a w gazytach Lato.

Ciyngiym u nos Lato, czy podzim czy zima.

Czy na to richtich żodny rady niy ma?

 

NOWY SZPORT OLIMPIJSKI.

O roku! Uf! Jak dugo tak idzie,

że ino ło szporcie godać sie bydzie?

Godać trzeba. To nasz szport narodowy.

Może to kejś kômuś przidzie do gowy,

by na olimpiada wpisali godanie.

I dobrze wiymy co wtedy sie stanie.

W ty kônkuryncji mômy pewne medale.

Wiync godejmy, godejmy, godejmy stale.

H.L.