Koło w Piekarach Śląskich – zgpiekary.pl

LETNIE RAJZŮWANIE

Zaś zaczyno sie Ślônzokôw rajza,

jedni po drôdze, drudzy po glajzach,

bydôm i tacy co jadôm na kole,

abo piździkym, co był w stodole.

Niykierym nawet prziszło do gowy,

by lecieć kajś fligrym odrzutowym.

Jadôm, bo prziszed teroz czas taki.

Pakujôm kofry, tasie, rukzaki,

do kerych wcisnôm co w dôma majôm.

Przed tym markety tyż łodwiedzajôm.

Pakujôm treski, krôtke galotki,

badykostimy, kota do klotki,

nowe szaty do paradůwanio

i hut co łod słôńca osłanio,

a do bajtlika karta kredytowo

i familia do rajzy gotowo.

Jak już wszystke pijôndze wydajôm,

łopolyni i z pioskym w kabzach wrocajôm.

Asić sie bydôm kaj to niy byli,

jake fajne zdjyńcia porobiyli.

Łobejrzeć je půdzie na „Naszy klasie”

i do „fejzbuka” tyż wciepnôńć do sie.

Wszyńdzie dobrze w dôma nojlepi – godajôm

a za rok zaś sie w rajza wybiyrajôm.

H.L.