ŚLÔNSKI LYK.

Jak ciynżko na duszy abo na ciele,

niypotrzebne sôm kropki ani ziele.

Niy musi sie robić auflaufu z tego,

bo ślônsko godka wylycy kożdego.

Styknie ino pedzieć ausdrukôw pora

i niy trza stoć w raji kajś u dochtora.

Gymba sie śmieje łod ucha do ucha.

Trza dać ino pozôr na boleści brzucha.

Ciśniynie spadnie, w krziżu juz niy szcziko,

 szłapy niy bolôm, serce lepi piko.

Tako jest moc w ty naszy ślônski godce,

wtory niy znojdzie sie w żodny tabletce.

Bezto trza jôm brônić, modym aplikuwać,

używać codziynnie i niy wyciepuwać.

H.L.