Koło w Piekarach Śląskich – zgpiekary.pl

WRAZICKO NYSIA

Na Dômbrôwce, tuż przi banie

miyszko Nysia, co jak wstanie

niy do żyć żodnymu w dôma.

Biere tyj i chleba krôma

i zadowo durch pytania.

Gowa puchnie nôm jak bania.

Wiela Ślônzokôw sie spisało?

Czy GUS nôm powiy prowda cało?

Kômu lepi nôm czy gorolôm?

Czymu nasza godka smolôm?

Wto wymyślył te rolady,

co sôm na niydzielne łobiady?

Wiela nudli pływo w zupie?

Czymu tepich durch sie klupie

na klopsztandze niy na pocie?

Czymu berkmôn po robocie

podobny jest do murzina?

Czy kura to jest gadzina?

Skônd sie wziyna Brynica?

Czy Brynica to granica?

Na Dioblinie diobły były?

Czy sie łône już straciyły?

Wiela piekorzy w Piekarach?

Czymu taczka to jest kara?

Czy na szpilplacu sie w szpilkach gro?

Czy kożdy Ślônzok godka zno?

I łod rana do wieczora

mynczy wszystkich mało zmora.

Dziadek z nerwów złômôł  kryka.

Poszed miyszkać do chlywika.

Starka cołko posiwiała,

hercklekotôw by dostała.

Mama na szezlônku siedzi

i łobmyślo łodpowiedzi.

Łobiadu niy nawarzyła,

wszystke gorki popolyła.

Nô a łojciec poszed z domu,

bydzie szukôł po kryjomu

tego, co to wszystko wiy.

I przidzie nazod abo niy.

H.L.